Goosen með þriggja högga forystu

Suður-Afríkumaðurinn Retief Goosen hefur þriggja högga forystu fyrir síðasta hringinn á Opna bandaríska meistaramótinu í golfi. Goosen er á þremur höggum undir pari en Bandaríkjamennirnir Olin Browne og Jason Gore eru jafnir í öðru sæti. Báðir hafa leikið holurnar 54 á pari. Ástralinn Mark Hensby og Nýsjálendingurinn Michael Campbell eru jafnir í fjórða sæti á einu yfir pari. Tiger Woods er í sjöunda sæti ásamt fjórum öðrum kylfingum, sex höggum á eftir Goosen. Fídjeyingurinn Vijay Singh er í 11.-14. sæti á fjórum höggum yfir pari. Sýnt verður beint frá mótinu á Sýn frá klukkan 18 í dag.