Maður dæmdur fyrir skjalafals
Fertugur maður hlaut í gær sex mánaða fangelsisdóm í Héraðsdómi Reykjavíkur fyrir að falsa áritun þrítugrar konu á skuldabréf sem hann notaði til að kaupa bíl á bílasölu í Reykjavík. Bréfið var gefið út í júní 2001 og konan óafvitandi komin í ábyrgð fyrir rúmar 1,3 milljónir króna. Ákæra var gefin út á hendur manninum í apríl síðastliðnum, en hann játaði fyrir dómi. Maðurinn hefur áður hlotið dóma fyrir þjófnaði og til sektargreiðslna vegna fíkniefnabrots. Þrír mánuðir dómsins voru skilorðsbundnir til þriggja ára.
