Astmi tengdur sundlaugaklór

Ný belgísk rannsókn bendir til þess að samhengi sé á milli astma í börnum og klórs í sundlaugum, að því er fram kemur á fréttavef breska ríkisútvarpsins, BBC.

Samkvæmt niðurstöðum rannsóknarinnar, sem Kaþólski háskólinn í Louvain lét gera, jókst hlutfall barnaastma um tvö til þrjú prósent á hverja innilaug á hundrað þúsund íbúa. Vísindamennirnir telja að helst sé notkun klórs í sundlaugum um að kenna.

Rannsóknin náði til 190 þúsund þrettán og fjórtán ára unglinga í 21 landi. Astmatilfelli hafa aukist um fimmtíu prósent á síðustu 25 árum í iðnríkjum.