Saxbygg kaupir í Steni í Noregi Fjárfestingin býður upp á mikla markaðssókn.

Saxbygg hefur eignast kjölfestuhlut í eignarhaldsfélagi utan um Steni sem framleiðir húsaklæðningar fyrir byggingariðnaðinn í Evrópu, Bandaríkjunum og Kanada. Félagið er með sterka stöðu á Íslandi og á hinum Norðurlöndunum, einkum á heimamarkaði í Noregi þar sem fjörutíu prósent sölunnar verða til.

Björn Ingi Sveinsson, framkvæmdastjóri Saxbyggs, telur að félagið komi inn á mjög heppilegum tíma nú þegar sér fyrir endann á endurskipulagningu Steni sem staðið hefur yfir í um tvö ár. Steni býður upp á talsverða stækkunarmöguleika en framleiðslugetan er ekki nýtt nema að sextíu prósentum. Það er hægt að fara í töluverða markaðssókn með félagið og afurðir þess án þess að taka inn miklar fjárfestingar.

Ásamt Saxbygg koma belgískir, finnskir og norskir fjárfestar að kaupunum sem eru skuldsett og fjármögnuð af Glitni.

Saxbygg er tveggja ára gamalt fjárfestingafélag sem er fyrst og fremst í fjárfestingum í fasteignum og byggingartengdum hlutum erlendis. Félagið er í jafnri eigu Saxhóls, Nóatúnsfjölskyldunnar og Byggingarfélags Gylfa og Gunnars.