Vilja kaupa vatnsréttindin

Sveinn Steinarsson og Jenný Erlingsdóttir á jörðinni Litlalandi í vestanverðu Ölfusi hafa óskað eftir því við bæjarstjórnina að fá keypt til baka vatnsréttindi sem fyrri eigendur seldu sveitarfélaginu á sínum tíma. Sveinn segir í samtali við Fréttablaðið að fyrst og fremst sé um að ræða vatn í jörðu sem ekki hafi verið nýtt hingað til. Hann segir ekkert sérstakt standa til með nýtingu á vatninu á þessum tímapunkti; fyrst og fremst sé ætlunin að sameina vatnsréttindin jörðinni að nýju. Bæjarstjórnin fól lögmanni sínum að skoða málið.