Fáir nota netvarpið

Niðurstöður nýlegrar könnunar sem bandaríska stofnunin Pew Internet and American Life Project gerði í Bandaríkjunum fyrir nokkru, benda til að þeim fjölgi sem hafa nýtt sér netvarp (e. podcast), en það er hljóð-, mynd- eða myndbandsefni sem hægt er að hala niður af netinu og hlusta og horfa á í spilurum á borð við iPod, sem geta ráðið við stafrænt efni á samþjöppuðu formi.

Netvarp sem þetta hefur notið vaxandi vinsælda víða um heim á síðastliðnum tveimur árum eða svo og hafa nokkrir fréttamiðlar farið að bjóða upp á efni sitt með þessum hætti.

Niðurstöðurnar sýna hins vegar að fáir nýta sér tæknina með reglulegum hætti.

Í könnuninni kemur meðal annars fram að 12 prósent Bandaríkjamanna hafa prófað að hala niður efni af netinu og hlusta á en það er 5 prósentustigum fleiri en gerðu slíkt hið sama í sambærilegri könnun stofnunarinnar í febrúar.

Einungis eitt prósent þátttakenda sagðist hlaða niður efni vegna útsendingar á ákveðnu efni en það er óbreytt niðurstaða frá því fyrr á árinu.

Þá benda niðurstöður sambærilegrar könnunar, sem greiningafyrirtækið Nielsen/NetRatings gerði að netverjar í Bandaríkjunum séu rétt rúmlega 207 milljónir talsins.