Diaw líklegur framfarakóngur

Hinn fjölhæfi franski leikmaður Boris Diaw hjá Phoenix Suns þykir líklegastur til að verða kjörinn framfarakóngur NBA deildarinnar í ár, en á hverju ári er einn leikmaður verðlaunaður sérstaklega fyrir að hafa náð mestum framförum frá árinu áður.

Diaw kom til Phoenix frá Atlanta í fyrra og hefur spilað betur en nokkur þorði að vona. Hann var varaskeifa hjá Atlanta, en hefur gegnt algjöru lykilhlutverki hjá Phoenix sökum fjölhæfni sinnar. Diaw skoraði að meðaltali 13 stig, hirti 7 fráköst og gaf 6 stoðsendingar og bætt sig á öllum sviðum leiksins. Hann er um tveir metrar á hæð og hefur spilað nánast allar stöður á vellinum í vetur.