Guðjón Valur fór á kostum

Guðjón Valur Sigurðsson fór á kostum og skoraði 10 mörk fyrir lið sitt Gummersbach í dag þegar liðið gerði jafntefli 31-31 við Flensburg. Róbert Gunnarsson skoraði 2 mörk fyrir Gummersbach í leiknum, en liðið er í öðru sæti deildarinnar fyrir lokaumferðina.

Einar Hólmgeirsson skoraði 8 mörk og Alexander Petersson skoraði 2 þegar lið þeirra Grosswallstadt vann auðveldan sigur á Melsungen 31-23. Logi Geirsson var á ný í liði Lemgo sem lagði Lubbecke 38-35 á útivelli. Snorri Steinn Guðjónsson skoraði 5 mörk fyrir lið sitt Minden í dýrmætum 29-28 sigri liðsins á Hamburg í botnbaráttunni. Þá skoraði Markús Máni Michaelsson 5 mörk fyrir Dusseldorf í 28-26 sigri á Wilhelmshavener, en Gylfi Gylfason skoraði þar 2 mörk fyrir Wilhelmshavener.