Hitinn gerði okkur erfitt fyrir

David Beckham, fyrirliði enska landsliðsins, segir að hitinn hafi gert liðinu erfitt fyrir í síðari hálfleiknum gegn Paragvæ í dag og sagði það helstu ástæðu þess að liðið hefði ekki verið sprækara en raun bar vitni.

"Ég er ekki viss um að fólk geri sér grein fyrir því hvað var heitt inni á vellinum. Við náðum að spila ágætlega á köflum, en misstum boltann allt of oft. Aðalatriðið er þó að ná í þrjú stig í dag og það var það sem við lögðum upp með.

Við verðum auðvitað að reyna að spila betur í næsta leik, en eins og ég sagði, gerði hitinn okkur mjög erfitt fyrir. Það hljóta að hafa verið 28-29 gráður," sagði Beckham, sem sjálfur ætti þó að vera vanur því að spila í hitanum þar sem hann leikur með Real Madrid á Spáni.