Meðalverð á fiski í fiskbúðum og stórmörkuðum á höfuðborgarsvæðinu hefur hækkað um tíu prósent frá því í janúar, samkvæmt nýrri verðkönnun verðlagseftirlits ASÍ.
Þetta er talsvert meiri hækkun en á flestum öðrum matvælum á sama tíma og munur á hæsta og lægsta verði á ákveðnum fisktegundum var allt að 113 prósent. Það var á hausaðri rauðsprettu, sem kostaði 365 krónur kílóið í Fiskbúðinni Trönuhrauni í Hafnarfirði en 800 krónur kílóið í Fiskbúðinni Arnarbakka.
Í átján tilvikum af þeim tuttugu og níu, sem skoðuð voru,var munur á hæsta og lægsta verði um og yfir 50 prósent. Lægsta verðið var oftast í fiskborði Fjarðarkaupa í Hafnarfirði en oftast hæst í Gallerý fiski við Nethyl í Reykjavík.
Melabúðin við Hagamel og Hafið-fiskprinsinn í Smáralind bönnuðu fulltrúum verðlagseftirlits ASÍ að taka niður verð í verslunum sínum. Athygli vekur að hæsta verð var oft í nýju verslanakeðjunni Fiskisögu, þannig að hagkvæmni stærðarinnar virðist ekki vera að skila sér til neytenda í þeim fiskbúðum.
