Landsflug hefur sagt upp samningi um sjúkraflug til Eyja

Landsflug hefur sagt upp samningi sínum við heilbrigðis- og tryggingarmálaráðuneytið og Tryggingarstofnun ríkisins um sjúkraflug til Vestmannaeyja. Uppsögnin tekur gildi um næstu áramót og er uppsagnarfresturinn níu mánuðir.

Landsflug tók að sér sjúkraflug frá Vestmannaeyjum um síðustu áramót. Í sumar var skipaður starfshópur til að gera úttekt á sjúkraflugi í Vestmannaeyjum frá áramótum. Í skýrslunni kom meðal annars fram að ekki hafi verið staðið við viðbragðstíma í þremur sjúkraflugum af fjörtíu. Einnig gerðist það í um fjórtán daga á tímabilinu að engin sjúkraflugvél var staðsett í Vestmannaeyjum.

Heilbrigðisráðuneytið hefur það nú til skoðunar hvort að styrkir til áætlunarflugs og sjúkraflugs í Vestmannaeyjum verið boðnir sameiginlega út en nýlega var ákveðið að styrkja áætlunarflug milli Reykjavíkur og Vestmannaeyja.