Óeirðir vegna erfiðra inntökuprófa í lögreglu á Indlandi

Hundruðu manna gengu berserksgang í borginni Ghaziabad í norðurhluta Indlands í gærkvöld til þess að mótmæla erfiðum inntökuprófum í lögregluna. Mennirnir réðust bæði á fólk og farartæki sem á vegi þeirra varð og voru hátt í 30 menn handteknir í óeirðunum.

Fram kemur á fréttavef breska ríkisútvarpsins að lögregla hafi verið nokkrar klukkustundir að ná tökum á ástandinu og beitti hún meðal annars kylfum í átökunum. Alls munu 20 þúsund manns hafa mætt í inntökupróf lögreglunnar en lögregluyfirvöld segjast hafa myndir af óeirðunum og verður umsóknum þeirra sem bera ábyrgð á þeim hafnað.

Yfirvöld á Indlandi reyna um þessar mundir að bæta ímynd lögreglunnar, meðal annars vegna ásakana um víðtæka spillingu og ofbeldi gagnvart borgurum, en ljóst þykir að óeirðirnar bæta ekki ástandið.