Jarðneskar leifar Páls postula finnast

Fornleifafræðingar sem hafa unnið fyrir Vatíkanið hafa fundið steinkistu sem er álitin innihalda jarðneskar leifar Páls postula, eins af lærisveinum Jesú. Kistan fannst í grafhýsi undir kirkju í Róm.

Uppgröfturinn hófst árið 2002 og lauk síðan í nóvemberlok. Talið er að þetta sé í fyrsta sinn í 1700 ár sem að steinkistan er sýnileg en á henni er áletrun á latínu sem segir „Píslarvotturinn Páll Postuli".

Steinkistan verður ekki opnuð að þessu sinni en kirkjan hefur engu að síður ekki útilokað þann möguleika að hún verði opnuð og innihald hennar rannsakað.