Tók fimm stráka fyrir veggjakrot

Fimm ungir skemmdarvargar voru gripnir í austurborg Reykjavíkur um hálfníuleytið í gærkvöld en þeir eru grunaðir um veggjakrot. Þetta kemur fram á vef lögreglunnar. Um var að ræða stráka á grunnskólaaldri og fann lögregla í kjölfarið nokkuð af sprebrúsum og pennum. Fleiri ungmenni komu við sögu lögreglunnar í Reykjavík í gær því síðar um kvöldið voru höfð afskipti af sjö unglingum á aldrinum 14-17 ára. Þeim var vísað út af stað sem hefur vínveitingaleyfi. Dvöl þeirra var því brot á reglum en þess má líka geta að samkvæmt útivistarreglum áttu nokkrir úr hópnum að vera komnir til síns heima.