Ætla ekki að gefast upp

Miðborg Kaupmannahafnar logaði í óeirðum í gærkvöld og varð lögregla að beita táragasi til að dreifa hundruðum manna sem mótmæltu lokun félagsmiðstöðvar. Íslensk kona sem var á vettvangi átakanna fylgdist með þegar bensínsprengjum var kastað í allar áttir.

Atburði gærkvöldsins má rekja til dóms Eystri-Landsréttar í vikunni um að hópi róttæklingarýma bæri að rýma félagsmiðstöð þar sem þeir hafa hafst við í rúm tuttugu ár. Frá því að dómurinn var kveðinn upp hafa friðsöm mótmæli farið fram en í gærkvöld, þegar um þúsund manns voru samankomnir á Nørrebro, sauð hins vegar upp úr. Lögregla segir að mótmælendur hafi byrjað að kasta að sér grjóti, flöskum, flugeldum og öðru lauslegu og því hafi hún ákveðið að láta til skarar skríða og skjóta táragasi á þá. Katrín Atladóttir var á leið til vinkonu sinnar á Nørrebro þegar lætin voru hvað mest. Lögregla hafði þá lokað svæðinu enda loguðu eldar á götum og bensínsprengjur og rakettur flugu í allar áttir.

Um síðir tókst laganna vörðum skipta æstum múgnum upp í smærri fylkingar og þegar yfir lauk höfðu tæplega þrjú hundruð manns verið færðir í fangageymslur. Fjórir lögreglumenn hlutu sár í átökunum og sömuleiðis nokkrir mótmælendanna. Katrín segir að talsverðar skemmdir hafi verið unnar, sérstaklega þar sem stórfyrirtæki voru til húsa. Í morgun var hins vegar ró að mestu komin á.

Síðdegis fluttu svo róttæklingarnir yfirlýsingu úr einum af gluggum hússins. Þar sökuðu þeir lögregluna um valdníðslu og sögðust ekki ætla að gefast upp fyrr en í fulla hnefana.

Borgaryfirvöld seldu kristnu trúfélagi húsið umdeilda fyrir nokkru og nú ætla þau að láta sverfa til stáls. Ritt Bjerregaard borgarstjóri segir að lögreglan hafi brugðist rétt við, því unglingarnir verði að yfirgefa húsið. Áður hafði hún sagt að þeir gætu verið þar áfram.