Hóta hefndum verði Saddam líflátinn

Baathflokkur Saddams Hussein hótaði í dag hefndum ef forsetinn fyrrverandi verður tekinn af lífi. Í yfirlýsingu sem birt var á netinu sagði að það væri rauð lína sem Bandaríkjamenn ættu ekki að stíga yfir.

Þar sagði einnig að ef Saddam yrði líflátinn myndi flokkurinn hefna sín á Bandaríkjunum hvar sem væri í heiminum og með öllum tiltækum ráðum. Saddam hefur verið dæmdur til dauða fyrir glæpi gegn mannkyninu og samkvæmt íröskum lögum á að taka hann af lífi innan þrjátíu daga.