Hráolíuverð hækkaði á fjármálamörkuðum

Heimsmarkaðsverð á hráolíu hækkaði lítillega á helstu fjármálamörkuðum í dag. Þetta er önnur hækkunin á tveimur viðskiptadögum en verðið hækkað um einn bandaríkjadal á tunnu í gær. Ástæðan fyrir hækkuninni nú er sú að lítil breyting varð á olíubirgðum í Bandaríkjunum á milli vikna.

Samkvæmt því sem fram kemur í vikulegri skýrslu bandaríska orkumálaráðuneytisins í gær var lítil breyting á olíubirgðastöðu Bandaríkjanna. Þetta er þvert á væntingar greinenda, sem höfðu gert ráð fyrir nokkurri hækkkun á milli vikna. Eldsneytisbirgðir drógust hins vegar saman á meðan birgðir af olíu til húshitunar jókst nokkuð á móti. Heildarbirgðirnar hafa dregist nokkuð saman undanfarnar vikur og eru undir meðaltalinu á sama tíma fyrir ári.

Greinendur óttast að litlar olíubirgðir geti komið illa við Bandaríkjamenn enda muni eftirspurnin eftir eldsneyti aukast nokkuð eftir því sem líður á sumarið.