Kauphallarfulltrúar ræða málin

Fulltrúar norrænu kauphallarsamstæðunnar OMX og kauphallarinnar í Dubai ætla að funda í dag og ræða um hugsanlegt tilboð hinna síðastnefndu í meirihluta bréfa í OMX. Fréttastofa Associated Press segir geta stefnt í yfirtökubaráttu á milli kauphallarinnar í Dubai og bandaríska hlutabréfamarkaðarins Nasdaq um OMX.

Kauphöllin í Dubai greindi frá því á fimmtudag að hún hefði keypt 4,9 prósenta hlut í OMX-samstæðunni á 230 sænskar krónur á hlut og hefði aukinheldur tryggt sér kauprétt á allt að 27,4 prósentum á sama verði.

Heidi Wendt, talsmaður OMX-samstæðunnar, vildi ekki tjá sig um efni fundar forsvarsmannanna í samtali við Associated Press, sem hefur eftir stjórn OMX að ekkert liggi fyrir um næstu skref kauphallarinnar í Dubai þar eð einungis hafi borist yfirtökutilboð frá Nasdaq.