Federer mætir Sampras í nóvember

Tveir af sigursælustu tennisleikurum sögunnar munu leiða saman hesta sína í nóvember þegar Roger Federer mætir Pete Sampras í sérstökum sýningarleik í Malasíu. Federer gerir harða atlögu að meti Sampras, sem vann á sínum tíma 14 risatitla í tennis. Sampras hefur ekki spilað síðan hann vann opna bandaríska meistamótið árið 2002.

Þeir Federer og Sampras mættust aðeins einu sinni á móti og það var árið 2001. Þar hafði Federer betur í æsilegum leik. Þeir félagar æfðu svo saman á heimili Sampras í Los Angeles fyrr á þessu ári. "Ég gef ekkert upp um úrslit leikjanna sem við spiluðum heima hjá Pete, en ég get lofað ykkur að þar voru sýndir miklir taktar," sagði Federer. Þeir fyrirhuga annan sýningarleik í New York næsta vor og verður hann haldinn í Madison Square Garden.