„Nauðsynlegar aðgerðir,“ segir Bush

„Þær stundir hafa komið upp í bandarískri sögu að nauðsynlegt hefur verið að grípa til aðgerða. Sú stund er runnin upp,“ sagði George W. Bush, forseti Bandaríkjanna, á blaðamannafundi fyrir utan Hvíta húsið í Washington í Bandaríkjunum fyrir stundu að loknum fundi með Henry Paulson, fjármálaráðherra landsins, Christopher Cox, forstjóra Fjármálaeftirlitsins, og fleirum. Bush fór yfir aðgerðir stjórnvalda upp á síðkastið sem falið hafa í sér viðamiklar björgunaraðgerðir, svo sem þjóðnýtingu hálfopinberu fasteignalánasjóðanna Fannie Mae og Freddie Mac auk yfirtöku á tryggingarisanum AIG. Þá fór hann lítillega yfir tillögur stjórnvalda að setja á laggirnar sjóð sem taka muni við verðlausum skuldabréfavafningum bandarískra fjármálafyrirtækja og öðrum bréfum og banni við skortsölu auk hertari reglna um starfsemi fjármálafyrirtækja og verðbréfaviðskipti. „Þeir sem verða staðnir að því að brjóta reglurnar verða dæmdir,“ sagði forsetinn og lagði áherslu á að hefði ekki verið gripið til þessara umsvifamiklu aðgerða hefði verið hætta á að hagkerfið hefði lent í miklum hremmingum með skelfilegum afleiðingum fyrir landsmenn. Þá vonaðist forsetinn til þess að aðgerðirnar, sem muni kosta skattgreiðendur hundruð milljarða dala, muni skila sér í aukinni trú á fjármálakerfið, sem hafi beðið skipsbrot upp á síðkastið. .