Fleygði fjórum börnum sínum fram af brú

Maður í Alabama sem fleygði fjórum ungum börnum sínum fram af brú, gerði það til þess að hefna sín á eiginkonu sinni. Lam Luong, sem er 37 ára gamall tilkynnti um hvarf barnanna á mánudag.

Hann sagði lögreglunni að kona sem þau hefðu verið hjá hefði ekki skilað þeim. Við yfirheyrslur játaði hann hinsvegar að hafa keyrt með börnin út á Dauphin Island brúna og fleygt þeim þar framaf.

Brúin er um 30 metra yfir sjávarmáli. Börnin voru fjögurra mánaða, eins árs, tveggja ára og þriggja ára. Fjölmargir bátar og þyrlur leita nú barnanna en ekki eru taldar nokkrar líkur á að þau finnist á lífi. Lam Luong er í fangelsi í Mobile í Alabama.