Segir að örlög 14% hlutar í Iceland ráðist strax

Malcolm Walker forstjóri verslunarkeðjunnar Iceland segir að örlög tæplega 14% hlutar í Iceland, sem nú er í eigu Landsbankans, muni ráðast strax. Hann vildi síðan ekki tjá sig nánar um málið að því er segir í frétt á Bloomberg-fréttaveitunni.

Walker segir að nú séu aðeins tveir eigendur að Iceland, það er stjórn keðjunnar og íslenska ríkið í gegnum skilanefndir Landsbankans og Glitnis. Það hefur hinsvegar margoft komið fram að engin áform eru af hálfu Landsbankans að selja þennan hlut í bráð en hluturinn var fyrrum í eigu Baugs.

Þetta staðfestir Zelf Hussain forstjóri PricewaterhouseCoopers, sem fer með stjórn hlutarins fyrir hönd íslenskra stjórnvalda, í tölvupósti til Bloomberg. Hussain segir að ætlunin sé að halda hlutnum áfram.

Bloomberg ræddi einnig að Piers Schreiber talsmann Landsbankans í London um málið sem segir að ekkert sé að gerast hvað varði hlutinn.

Iceland skilaði mjög góðu uppgjöri fyrir síðasta reikningsár sem lauk í lok mars. Hagnaður nam 23 milljörðum kr. af rekstri keðjunnar. Og veltan jókst um 16% frá fyrra ári og nam 420 milljörðum kr.