Hamburg tók Manchester City í karphúsið

Hamburg gerði sér lítið fyrir og vann 3-1 sigur á Manchester City í fyrri leik liðanna í fjórðungsúrslitum UEFA-bikarkeppninnar.

Stephen Ireland kom City yfir strax á fyrstu mínútu leiksins en Joris Mathijsen jafnaði metin fyrir heimamenn aðeins átta mínútum síðar.

Piotr Trochowski kom svo Hamburg yfir úr víti á 63. mínútu og Jose Paolo Guerrero innsiglaði góðan sigur Þjóðverjanna á 79. mínútu.

Fyrr í kvöld vann Shakhtar Donetsk 2-0 sigur á Marseille. Þá gerðu PSG og Dinamo Kiev markalaust jafntefli og Werder Bremen vann 3-1 sigur á Udinese.

Diego skoraði tvö marka Werder Bremen og Hugo Almeida það þriðja. Fabio Quagliarella skoraði mark Udinese.

Þetta voru fyrri viðureignir liðanna í fjórðungsúrslitum keppninnar.