Falskar sígarettur, ónothæfar viagra pillur, merkjavörur í ódýrum eftirlíkingum, sjóræningja CD og DVD diskar. Ólöglegar vörueftirlíkingar flæða yfir Evrópu sem aldrei fyrr.
Þetta kemur fram í árlegri skýrslu framkvæmdanefndar Evrópusambandsins um vörueftirlíkingar sem hald var lagt á innan landamæra ESB á síðasta ári.
Aukningin á þessum innflutningi hefur tvöfaldast. Í fyrra var verðmæti þeirra vara sem tollyfirvöld gerðu upptækar um 4,2 milljarðar kr. Hafði upphæðin tvöfaldast miðað við árið á undan.
Þegar litið er á tölfræði frá tollembættum landa innan ESB yfir fjölda mála þar sem ólöglegar vörueftirlíkingar koma við sögu sést að slík mál voru tæplega 5.000 talsins árið 1999. Í fyrra voru þau orðin samtals 49.000 talsins.
Í umfjöllun um málið í Jyllands Posten kemur fram að ólöglegar vörueftirlíkingar ná einkum til CD og DVD diska og sígaretta. En eftirlíkingar af fötum, leikföngum, snyrtivörum, skartgripum, rafmagnstækjum og lyfjum eru einnig algengar. Hvað lyfin varðar eru eftirlíkingar a viagra efst á listanum.
Þessar vörueftirlíkingar koma að stærstum hluta frá Kína eða 54% af heildarmagninu. Og mest af þeim næst í Rotterdam enda er þar að finna eina stærstu gámahöfn í Evrópu.
