Vill koma í veg fyrir bónusgreiðslur AIG

Barack Obama forseti Bandaríkjanna hefur látið íljós reiði sína á 165 milljóna dollara bónusgreiðslunum sem yfirmenn AIG tryggingarrisans hafa fengið greidda, en fyrirtækinu var bjargað af ríkinu frá gjaldþroti.

„Það er erfitt að skilja hvers vegna yfirmenn hjá AIG eigi rétt á bónusgreiðslum, hvorki meira né minna en 165 milljónir dollara í aukagreiðslur," sagði Obama.

Hann sagði greiðslurnar einnig vera „hneyksli" á sama tíma og hann tilkynnti um aðstoð við lítil fyrirtæki sem hafa farið illa út úr kreppunni.

Hann hefur sagt Timothy Geithner fjármálaráðherra að „leita allra lögfræðilegra leiða til þess að koma í veg fyrir þessar bónusgreiðslur."

AIG tilkynnti um bónusgreiðslurnar á sunnudag. „Um allt land, er fólk sem vinnur baki brotnu og mætir skyldum sínum á hverjum degi, án aðstoðar ríkisins eða milljón dollara bónusgreiðslna," sagði Obama.

„Það eina sem þetta fólk biður um er að allir, frá Main Street til Wall Street til Washington, sitji við sama borð."