Auðugustu Norðmennirnir tapa 2.100 milljörðum

 

Sameiginlegt tap 400 auðugustu Norðmannana á síðusta ári nemur tæplega 100 milljörðum norskra kr. eða um 2.100 milljörðum kr. Ef litið er á þá 10 sem skipa toppinn á listanum yfir auðugustu menn Noregs er tap þeirra samtals 27 milljarðar norskra kr. eða rúmlega fjórðungur af heildartapi þessa fólks.

 

Viðskiptablaðið Kapital birtir í dag árlegan lista sinn yfir auðugustu Norðmennina. Þar kemur fram að sameiginlega eiga þeir nú 616 milljarða norskra kr. og að þau auðæfi hafi minnkað um tæplega 100 milljarða norskra kr. frá fyrra ári.

 

Efstur á lista Kaiptal er skipakóngurinn John Fredriksen en eignir hans eru metnar á 46,1 milljarða norskra kr. Hefur auður hans skroppið saman um 8,8 milljarða norskra kr. á milli ára.

 

Meðal Norðmanna sem þekktir eru hér á landi og eiga pláss á listanum má nefna Kjell Inge Rökke en félag hans Aker var viðloðandi olíuleit á Drekasvæðinu til skamms tíma. Hann hefur tapað um fjórðung af auðæfum sínum en heldur eftir 3,2 milljörðum norskra kr. í dag.