Eignast líklegast Citigroup

Bandaríska ríkið mun að öllum líkindum eignast þjóðnýtta bandaríska fjármálafyrirtækið Citigroup. Fyrirtækið fékk um 3000 milljarða íslenskra króna í neyðaraðstoð á síðasta ári sem dugði ekki til og stendur það nú á brauðfótum.

Þetta kemur fram í Wall Street Journal en samkvæmt heimildum blaðsins vonast stjórnendur bankans að eignarhlutur ríkisins verði ekki meiri en 25% og fari ekki yfir 40%.

Ríkið hefur ítrekað komið Citigroup, sem er ein stærsta fjármálastofnun heims, til bjargar og á í dag tæpan 10% hlut. Í október fékk Citigroup 3000 milljarða íslenskra króna í neyðaraðstoð frá bandarískum stjórnvöldum. Hlutabréf héldu þó áfram að lækka og í nóvember var samþykkt að láta Citigroup fá rúma 2000 milljarða til viðbótar. Þar að auki tryggði ríkið bankann fyrir tapi sem varð til vegna verðrýrnunar á eignum hans.

Hlutabréf hafa hríðlækkað undanfarið og hafa ekki verið lægri í átján ár. Bankinn stendur núna á brauðfótum og er talið að ríkið verði að þjóðnýta hann til að bjarga honum frá falli. Líklegt er að Citigroup verði nokkurs konar fyrirmynd þess hvernig bandarísk yfirvöld munu styrkja þá banka sem eiga í vandræðum.