Rökke tryggir sér 195 milljarða samning í Kaspíahafi

Aker Solutions, félag Kjell Inge Rökke í Noregi, hefur tryggt sér samning í tengslum við olíuvinnslu í Kaspíahafi. Er talið að verðmæti samningsins sé 10 milljarðar norskra kr. eða um 195 milljarðar kr.

Aker-samsteypan átti sem kunnugt annað af tveimur tilboðum í olíuleit á Drekasvæðinu eins og greint var frá í dag.

Samkvæmt samningnum sem Aker hefur gert í Kaspíahafi á félagið að standa að uppbyggingu á fyrsta áfanganum í olíuvinnslu á svæðinu. Mun Aker vinna að þessu verkefni í samvinnu við Saipem olíufélagið.

Verkefni þetta stendur fram til ársins 2011 en síðan mun Aker verða ráðgefandi við olíuvinnsluna árið 2012.

Olíusvæðið sem hér um ræðir er það stærsta sem fundist hefur undanfarin 40 ár og er talið að það muni gefa af sér 1,5 milljónir tunna á dag þegar vinnslan verður komin í fullan gang.