Bresk sveitarfélög sofandi gagnvart íslensku bönkunum

Bresk þingnefnd, skipuð fulltúrum allra flokka á breska þinginu, hefur gagnrýnt sveitar- og bæjarfélög landsins fyrir að hafa verið sofandi gagnvart áhættunni af íslensku bönkunum í Bretlandi.

Samkvæmt frétt á BBC hefðu þessir aðilar átt að bregðast við aðvörunum sem þeim bárust um slæma stöðu íslensku bankanna og taka fé sitt út af reikningum sínum hjá þeim. Alls áttu um 100 bæjar- og sveitarfélög í Bretlandi fé inn á reikningum í íslensku bönkunum þegar þeir hrundu s.l. haust. Heildarupphæðin var um einn milljarður punda eða um 210 milljarðar kr.

Þingnefndin segir að kæruleysi, skortur á sérfræðiþekkingu og aðgerðarleysi hafi valdið því að skattafé almennings hafi verið í hættu. Hópur frá viðkomandi félögum segir hinsvegar að þau hafi fengið slæma ráðgjöf í málinu.

Frá árinu 2004 hafa bæjar- og sveitarfélög getað sett sér eigin reglur um lán og fjárfestingar. Reglur kveða hinsvegar á um að þau geti aðeins fjárfest hjá stofnunum með háar lánshæfiseinkunnir, þau verði að fjárfesta í breskum pundum og að leysa beri inn fjárfestingarnar innan árs frá því þær eru gerðar.

Sum þessarar bæjar- og sveitarfélaga héldu áfram að setja fé inn á reikninga í íslensku bönkunum eftir september í fyrra þegar ljóst lá fyrir að lánshæfiseinkunnur bankanna höfðu hrunið.