The City – Wall Street, nýtt lúxusflug fyrir fjármálafólk

British Airways er byrjað að bjóða fjármálafólki og verðbréfasölum upp á nýtt lúxusflug beint frá The City, fjármálahverfi London og til Wall Street í New York. Notast er við Airbus A318 vélar sem hefur verið breytt þannig að farþegafjöldanum um borð hefur verið fækkað úr 100 og niður í 32.

Samkvæmt frétt í blaðinu Guardian er flugleiðin sérsniðin að þörfum fjármálafólks en um borð geta farþegarnir unnið, verið í netsambandi eða sofið eins og þeir væru heima hjá sér.

Farmiðarnir eru ekki gefnir því sá ódýrasti, báðar leiðir, kostar 380.000 kr. og sá dýrasti kostar eina milljón kr.

Vélin frá British Airways þarf að millilenda á Shannon á Írlandi til að taka eldsneyti en flugfélagið hefur komið því þannig fyrir að þar geta farþegarnir farið í gegnum bandarískt vegabréfaeftirlit og tollskoðun.

Gagnrýnendur þessarar nýju þjónustu benda á að tímasetning hennar gæti vart verið verri. Þrjú félög sem buðu upp á slíkar lúxusferðir yfir Atlantshafið hafa öll gefist upp á slíku flugi en þetta eru Silverjet, Maxjet og Eos.