Hagnaður Bank of America langt yfir væntingum

Stærsti banki Bandaríkjanna, Bank of America, birti uppgjör sitt fyrir fyrsta ársfjórðung ársins í dag. Hagnaður bankans reyndist vera langt yfir væntingum greinenda og sérfræðinga. Bankinn er sá fjórði af stórbönkum Bandaríkjanna sem skilar góðu uppgjöri það sem af er ári.

Nettóhagnaður Bank of America reyndist nema 4,24 milljörðum dollara eða tæplega 600 milljörðum kr. Á sama tímabili í fyrra nam hagnaðurinn hinsvegar 1,2 milljörðum dollara.

Samkvæmt frétt á Bloomberg reiknuðu greinendur með að hagnaður bankans á fjórða ársfjórðungi myndi gefa af sér 4 sent á hlut. Í raun mun upphæðin nema 44 sentum á hlut.

Forstjóri Bank of America, Kenneth D. Lewis, hefur ekki verið vinsæll í hópi hluthafa frá því að hann ákvað að kaupa tvo banka í fyrra, Merrill Lynch og Countrywide Financial Corp. Til þessa notaði hann 30 milljarða dollara eða nær 4.000 milljarða kr.

Þegar kaupin áttu sér stað var fjármálakreppan komin á fullt skrið og töldu margir hluthafa að Lewis væri að setja bankann á hausinn með þessum kaupum. Annað hefur komið á daginn og það er raunar rekstur Merrill Lynch sem stendur á bakvið megnið af hagnaðinum nú.

Staða Lewis þykir þó enn tæp og ráðast örlög hans í forstjóraembættinu á aðalfundi Bank of America þann 29. apríl n.k.