Hún tapaði 525 milljörðum í kreppunni

Þýskur milljarðamæringur hefur tapað öllum auðæfum sínum á fjármálakreppunni, samtals 525 milljörðum kr. Sú sem hér um ræðir er hin 65 ára gamla Madeleine Schickedanz, erfingi Quelle og stór hluthafi í Karstadt-keðjunni.

Í umfjöllun um málið í Jyllands Posten segir að þar til snemma á þessu ári hafi Madeleine lifað í ævintýralegum lúxus. Átti risavillur víða í heiminum, hallir og sumarhús bæði við ströndina og upp til fjalla, ferðaðist um heiminn í einkaþotum og fór varla úr húsi án þess að vera keyrð í limmósínum með einkabílstjórum.

Nú eru þessi auðæfi, og lífstíllinn, horfin eftir að Arcandor samsteypan varð gjaldþrota. Arcandor var regnhlífarfélag fyrir eignir Madeleine sem fyrir utan þýsku póstdreifinguna Quelle og Karstadt taldi einnig ferðaþjónusturisann Thomas Cook.

Þegar hafa um 70.000 kröfuhafar gefið sig fram með kröfur á hendur Arcandor. Allt sem Madeleine átti af fasteignum og lóðum var veðsett upp úr rjálfrinu fyrir skuldum samsteypunnar. Fyrir mánuði síðan kvartaði Madeleine yfir því í þýskum fjölmiðlum að í dag hefði hún aðeins um 100.000 kr. til að lifa af mánuðinn.

En það er ljós puntur í þessu fyrir Madeleine. Henni tókst að koma ættaróðalinu, höll á 20.000 fermetra jörð við Fürth, í hendur sonar síns, Matthias. Og jafnframt er tryggt að þar getur hún búið til æfiloka.