Sænsk greifynja vill milljarða frá manni sínum í skilnaðarmáli

Sænska greifynjan Marie Douglas-David hefur krafið eiginmann sinn um milljarð sænskra kr. eða um 14 milljarða kr. í skilnaðarmáli þeirra til þess að geta haldið lífsstíl sínum óbreyttum að hjónabandinu loknu.

Marie telur að hún komist ekki af með minna en 9 milljónir kr. á viku til að geta lifað sómasamlegu lífi. Þar af notar hún 800.000 kr. í fatakaup á viku, persónulegur aðstoðarmaður hennar kostar 400.000 kr. og blómakaupin nema 100.000 kr. á viku svo dæmi séu tekin.

Viðskiptamaðurinn David Douglas er eiginmaður Marie og ekki á flæðiskeri staddur því auðæfi hans nema hátt í 40 milljörðum kr. Þau giftust árið 2002 en hjónabandinu var lokið 2006 þegar Marie greip hann í bólinu með annarri konu.

Til að sækja málið fyrir sig hefur Marie ráðið til sín stjörnulögfræðinginn William Beslow sem er þekktur fyrir að hafa rekið skilnaðarmál Miu Farrow gegn Woody Allen og mál Mariu Maples gegn Donald Trump. Málið er rekið fyrir bandarískum dómstól.