Markaðsvirði Unibrew minnkaði um 65% á þremur vikum

Markaðsvirði Royal Unibrew, næststærstu bruggverksmiðju Danmerkur, hefur lækkað um 65% á s.l. þremur vikum eða frá því að Unibrew birti ársuppgjör sitt þann 25. Febrúar. Stoðir eru einn stærsti hluthafinn í Royal Unibrew með 25% hlut.

Hlutir í Unibrew féllu um 1% í kauphöllinni í Kaupmannahöfn í morgun eftir að fregnir bárust um að annar stór hluthafi í félaginu, Arlo Global Management, væri að selja hluti sína á því sem börsen.dk kallar útsölu. Hefur Arlo minnkað hlut sinn úr 11,18% og niður í 9,84% það sem af er morgninum.

Unibrew skilaði tapi upp á hálfan milljarð danskra kr. eða um 10 milljarða kr. á síðasta ári. Samhliða því voru áætlanir félagsins um vöxt á næstu þremur árum slegnar af.

Hlutir í Unibrew eru nú komnir niður í 39 danskra kr. sem er hið sama og þeir voru í árið 1988.

Orðrómur hefur verið í gangi um að Unibrew sé nálægt því að vera gjaldþrota. Jens Houe Thomsen greinandi hjá Jyska Bank segir að viðbrögð markaðarins bendi til þess að gjaldþrotahættan hjá félaginu sé ekki aðeins kenning.