Sjóræningjar setja upp kauphöll til að fjármagna aðgerðir

Sjóræningjarnir hafa herjað á hafsvæðinu út af Horni Afríku, það er á Aden flóanum og Indlandshafi og hafa grætt tugi milljóna dollara á ránum sínum. Vera herskipaflota á þessum slóðum hefur haft það eitt í för með sér að sjóræningjarnir sækja lengra á haf út.

Það er eftir töluverðu að slægjast segir í umfjöllun Reuters og áhugasamir fjárfestar frá öðrum hlutum Sómalíu og öðrum þjóðum hafa nú sett upp skipulagaðan markað til að annast fjármál sín.

Einn auðugur fyrrum sjóræningi, Mohammed að nafni, fór með fréttamanni Reuters í skoðunarferð um markaðinn og lét þess getið í leiðinni að það væri nauðsynlegt að hafa stuðning staðarbúa fyrir aðgerðum sjóræningjanna.

„Við settum þennan markað upp fyrir fjórum mánuðum síðan þegar monsúnrigningarnar stóðu yfir," segir Mohammed. „Við byrjuðum með 15 „skipafélög" en nú eru þau orðin 72 talsins. Tíu þeirra hafa þegar skilað hagnaði."

Mohammed segir ennfremur að hver sem vill geti keypt hluti í þessum „skipafélögum" og arður sé greiddur eftir árangrinum á hafi úti. Markaðurinn er opinn 24 tíma á sólarhring.

Haradheere, sem liggur 400 km norður af Mogadishu, var áður fyrr lítið og rólegt sjávarþorp en núna er vart þverfótað þar fyrir lúxusjeppum sem stífla allar götur.

„Viðskipti tengd sjóránum eru nú orðin aðalatvinnuvegur þorpsbúa og bæjaryfirvöld fá sinn hluta af kökunni úr hverju velheppnuðu sjóráni," segir Mohamed Adam yfirmaður öryggismála í þorpinu.

Stjórnvöld geta lítið gert við ástandinu enda í harðri baráttu við íslamska uppreisnarmenn. Það er varla að stjórnvöld ráði meiru en nokkrum götum í Mogadishu, höfuðborg landsins.