Danskt fasteignafélag í klemmu eftir hrun Straums

Hið nýstofnaða fasteignafélag Pecunia Properties er komið í klemmu aðeins fjórum dögum eftir að það var stofnað í Kaupmannahöfn. Straumur var einn af stofnendum félagsins og átti þar að auki hlut í öðru félagi sem stendur að Pecunia, það er Property Group.

Markmiðið með stofnun Pecuina var að félagið myndi yfirtaka skuldsettar fasteignir sem danskir bankar hafa leyst til sín í töluverðum mæli eftir að fjármálakreppan skall á þar í landi s.l. haust.

Að sögn Jesper Damborg meðeigenda í Property Group getur hrun Straums sett strik í reikninginn hvað Pecunia varðar. Á hann þar við að áætlanir voru uppi um að víkka eigendahópinn á bakvið Pecunia en þær áætlanir eru nú í uppnámi.

Raunar var þegar búið að ganga frá einum samningi við Fiona bankann s.l. föstudag. Var þar um að ræða verslunarkjarnann Mary´s í Velje. Samdi Pecunia við bankann um að klára byggingu kjarnans gegn því að fá hlut af söluverði hans seinna meir.

Tryggingarfélagið Köbstædernes Forsikring stendur að Pecunia auk Straums og Property Group. Property Group er svo aftur í 40% eigu Straums en aðrir eigendur eru Guðmundur Þórðarsson, Birgir Bieltvedt og nokkrir Danir.

Fram kemur í umfjöllun á business.dk að yfirtaka Fjármálaeftirlitsins á Straumi hafi engin áhrif á rekstur Property Group. Svo heppilega hafi viljað til að Straumur breytti láni til Property í hlutafé skömmu fyrir stofnun Pecunia.

Jesper Damborg segir að það sé betra að hafa íslenska ríkið sem meðeigenda að félaginu heldur en lánadrottinn þess.