Framtíð Chrysler ræðst fyrir miðnætti

Bakslag kom í björgunaráætlun bílaframleiðandans Chrysler í gær þegar samningaviðræður bandaríska fjármálaráðuneytisins og lánardrottna Chrysler sigldu í strand. Samningar um sameiningu Chrysler og ítölsku Fiat-verksmiðjanna ganga þó betur og eru á lokastigi að sögn heimildarmanns sem tekur þátt í viðræðum fyrirtækjanna.

Barack Obama hefur sett ströng skilyrði fyrir sex milljarða dollara fjárveitingu til Chrysler ofan á það sem þegar hefur verið veitt og hefur Chrysler frest til miðnættis í kvöld til að uppfylla þau.