Buffett hagnast meir en Goldman Sachs

Ofurfjárfestirinn Warren Buffett hafði ástæðu til að brosa út að eyrum um helgina en fjárfestingafélag hans, Bershire Hathaway, hagnaðist um 3,24 milljarða dollara, eða rúma 400 milljarða kr., á þriðja ársfjórðung. Er þetta meiri hagnaður en hjá Goldman Sachs.

Uppgjörið var birt aðfararnótt laugardagsins en stór hluti af hagnaði Warren Buffett er raunar til komin vegna þekktrar stöðutöku Buffett í Goldman Sachs skömmu eftir síðustu áramót. Þá fékk Buffett kauprétt á 5 milljarða dollara virði af hlutum í Goldman Sachs þegar enginn annar vildi snerta við bankanum. Gengishagnaður hans af þeim kauprétti nemur nú rúmlega 2 milljörðum dollara.

Hinn mikli uppgangur á hlutabréfamörkuðum heimsins undanfarna mánuði olli því að Bershire Hathaway þrefaldaði hagnað sinn á þriðja ársfjórðung m.v. sama tímabil í fyrra.

Félagið fór illa út úr fjármálakreppunni á síðasta ári eins og flestir aðrir. Var þá jafnvel rætt um að „véfréttin frá Omaha" eins og Buffett er stundum kallaður hefði misst næmni sína á gróðatækifæri. Uppgjörið nú sýnir að svo er ekki.