Ísland skapar mikla umræðu í Noregi um ESB aðild

Mikil umræða er nú í Noregi um aðildarviðræður við Evrópusambandið og hvort ekki sé réttast að Noregur fylgi Íslandi eftir fari svo að Íslendingar hefji sínar viðræður við ESB.

Raunar voru stjórnarflokkarnir, sem mynda rauðgræna ríkisstjórn landsins sammála um að gera ESB ekki að kosningamáli en kosið verður til norska stórþingsins eftir fjóra mánuði.

Þetta samkomulag er úr sögunni samkvæmt frétt í stærsta dagblaði Noregs, Verdens Gang. Þar er rætt við Raymond Johansen ritara Verkamannaflokksins (Ap) sem segir að flokkurinn verði að halda þeim möguleika opnum í næsta stjórnarsamstarfi að Noregur fari á ný í aðildarviðræður.

Og þingmaðurinn Svein Roald Hansen segir að það væri ekki gáfulegt fyrir flokkinn að beygja sig undir vilja samstarfsflokka sinna í málinu.

„Hann varar við að svipað „sjálfsmorðsákvæði" verði í nýjum stjórnarsáttmála og hinum gamla sem í raun myndi binda Ap við að dyrnar að ESB yrðu lokaðar í önnur fjögur ár," segir í blaðinu.

Samkvæmt annarri frétt kemur fram að Hægri flokkurinn hefur töluverðar áhyggjur af framtíð þeirra strandhéraða Noregs sem háð eru sjávarútvegi ef Ísland verður meðlimur ESB.

„Aðild Íslands að ESB gæti aukið atvinnuleysi meðfram strandlengju Noregs," segir Erna Solberg formaður Hægri flokksins. „Það yrði hagkvæmara fyrir ESB að vinna ýmsa hrávöru á Íslandi."

Samkvæmt skoðanakönnun sem Verdens Gang birtir á vefsíðu sinni í dag kemur fram að 53,7% þjóðarinnar er andvíg aðild að ESB en 46,3% eru fylgjandi henni.