Dýrasta fasteign Evrópu er til sölu

Á einum besta stað í London, Belgrave Square nr. 10, er nú dýrasta fasteign Evrópu til sölu. Um er að ræða 1.950 fm lúxusíbúð og er verðmiðinn 100 milljónir punda eða um 21 milljarður kr.

Eigandi herlegheitanna undanfarin ár er líbanski fasteignamógúllinn Musa Salem en hann hefur að sögn börsen.dk dundað sér við það að gera íbúðina sem best úr garði.

Íbúðin telur 18 svefnherbergi ásamt sundlaug í kjallaranum. Þar að auki er að finna líkamsræktarsal og bílskúr sem getur rúmað flota af Bentley-bílum.

Og næstu nágrannar eru emírinn af Dubai, sheik Rashid Al-Maktorum, rússneski auðjöfurinn Oleg Deripaska og röð af sendiráðum.

Upprunalega var húsið byggt í byrjun nítjándu aldar af jarlinum af Grosvenor og síðar markgreifanum af Westminster. Byggingarstíllinn er undir áhrifum frá Miðjarðarhafinu með miklu af marmara og skrauti.

Verðið á þessari fasteign er á pari við dýrustu fasteign Bandaríkjanna en það er höll í Hollywood í eigu Candy Spelling sem sett var í sölu fyrir páska á 150 milljónir dollara.