Japanski bílaframleiðandinn Toyota neyðist til að draga úr starfsemi sinni í Bandaríkjunum. Nýverið var tilkynnt að laun starfsmanna í Bandaríkjunum yrðu lækkuð, vinnutími styttur, yfirvinna bönnuð og að engin framleiðsla verði í nokkra daga í apríl.
Samdráttur í sölu vinsælustu Toyota-bílanna, Corolla og Camry, nam 15 prósentum árið 2008 en hefur orðið enn meiri frá áramótum. Auk framangreindra ráðstafana hefur öllum bónusgreiðslum til yfirmanna verið sópað út af borðinu og þá hefur fyrirtækið hefur hætt við byggingu nýrrar verksmiðju í Mississippi.
Í byrjun febrúar tilkynnti bílaframleiðandinn að fyrirtækið gerir ráð fyrir að tapa 450 milljörðum jena, jafnvirði rúmlega 560 milljarða króna, vegna samdráttar á bílamarkaði á síðasta ári.
Það er þrisvar sinnum meira en fyrri spá bílaframleiðandans hljóðaði upp á. Síðasta spá var gefin út í enda síðasta árs.
Þetta verður jafnframt fyrsta tap bílaframleiðandans í 70 ár.
Toyota dregur úr starfsemi í Bandaríkjunum
