Vindmyllustyrkir ESB runnu í vasa mafíunnar á Sikiley

Lögregluyfirvöld á Sikiley standa nú fyrir umfangsmikilli rannsókn á vindorkugeira eyjarinnar en talið er að vindmyllustyrkir frá Evrópubandalaginu hafi runnið í vasa mafíunnar á eyjunni í gegnum spillta embættis- og stjórnmálamenn.

Samkvæmt umfjöllun um málið í Financial Times er um háar upphæðir að ræða. Umræddir styrkir voru veittir til að byggja vindmyllurnar á sérstökum vindmyllujörðum og námu þeir rúmlega 30.000 kr. á hverja kílówattstund sem hver vindmylla gaf af sér. Eftir að búið var að setja vindmyllurnar upp voru jarðirnar síðan seldar til orkufyrirtækja.

Sá sem stjórnar rannsókninni Roberto Scarpinato er vanur rannsóknum á starfsemi mafíunnar. Hann segir í samtali við FT að rannsóknin beinist að þremur stórum svæða á Sikiley, þar á meðal Palermo og Trapani.

Rannsókn sem fór fram í febrúar s.l. í Trapani leiddi í ljós tengsl embættis- og stjórnmálamanna við mafíufjölskyldu héraðsins sem bauð þeim atkvæði og fé í skiptum fyrir réttindi til að byggja vindmyllur. Fjölskyldan tengist svo aftur mafíuforingjanum Metteo Messina „Diabolik" Denaro en hann er ofarlega á lista ítölsku lögreglunnar yfir eftirlýsta glæpamenn.

Meðan á rannsókninni stendur hafa yfirvöld á Sikiley sem og í héruðunum Calabria og Basilicata á meginlandinu stöðvað allar nýbyggingar á vindmyllum. Bæði vegna glæpastarfseminnar í kringum þær sem og óljóst eignarhald á framkvæmdunum.