Evrópskir bankar stækka og sá fræjum að næstu kreppu

Í ítarlegri umfjöllun um málið á Bloomberg fréttaveitunni segir að BNP Paribas, Barclays Plc og Banco Santander SA séu meðal a.m.k. 353 evrópskra fjármálastofnanna sem orðnar eru stærri en þær voru í ársbyrjun 2007. Eignir fimmtán evrópskra banka eru nú meiri en nemur efnahag heimalanda þeirra. Fyrir þremur árum voru þeir tíu talsins í þessum hópi.

Sérfræðingar sem Bloomberg ræðir við um málið segja að verið sé að sá fræjum að næstu kreppu með þessari þróun sem átt hefur sér stað síðustu tvö árin

Samkvæmt úttekt Bloomberg hafa evrópskir bankar stækkað um 25% frá upphafi ársins 2007 á meðan bandarískir bankar hafa stækkað um 20% á sama tímabili.

Tom Kirchmaier hjá London School of Economics segir að fjármálakreppan hafi sýnt fram á að stórar fjármálastofnanir eru ógn við það þjóðfélag sem þær tilheyra, sérstaklega í minni löndum Evrópu.

„Að mínu mati er skynsamlegt að skipta þessum bönkum niður í minni einingar," segir Kirchmaier. „Ef við lendum í öðru efnahagsáfalli efast ég verulega um að minni löndin séu í standi til að lifa slíkt af."

Bæði Bretland og Ísland eru tekin sem dæmi í úttekt Bloomberg um hvaða hætta þjóðfélögum stafi af of stóru bankakerfi. Á Íslandi leiddi þetta að lokum til algers efnahagshruns og í Bretlandi berjast menn nú í bökkum með vaxandi atvinnuleysi og skattahækkunum til að mæta afleiðingum af því að hafa neyðst til Þess að bjarga bankakerfi sínu með gríðarlegum opinberum fjárútlátum.