Gjaldþrot Roskilde Bank kostar hvern Dana 50.000 krónur

Hneykslið í kringum gjaldþrot Roskilde Bank er að breytast í verstu hugsanlegu martröðina fyrir danska ríkissjóðinn og þar með skattgreiðendur landsins. Þegar upp er staðið mun gjaldþrotið kosta hvern Dana 2000 danskar kr. eða um 50.000 kr.

Þetta segir í frétt um málið á börsen.dk. Í ljós hefur komið að tap ríkissjóðsins er mun meira en áður var talið þegar bankinn var yfirtekinn af danska seðlabankanum og bankasjóði landsins (Det Private Beredskab) sem Fjármálaráð Danmerkur setti á fót til þess að yfirtaka banka í nauðum.

Fram að þessu hafa afskriftir seðlabankans og sjóðsins numið um 10 milljörðum danskra kr., eða um 250 milljörðum kr., og ekki eru öll krul komin til grafar enn að sögn Lars Jensen bankastjóra Roskilde Bank í viðtali sem Ökonomisk Ugebrev átti við hann fyrir helgina. Jensen vill ekki spá fyrir um hve tapið muni nema miklu þegar upp er staðið.

Samhliða þessu liggur ljóst fyrir að bankasjóðurinn muni ekki leggja meir en 750 milljónir danskra kr. í púkkið þannig að megnið af fyrrgreindum 10 milljörðum danskra kr. lendir á ríkissjóði.

Samkvæmt börsen.dk dugir þessi upphæð til að reka bæjarfélagið Roskilde Kommune með 82.000 íbúum í tvö ár og er þá allt talið með, skólar, stofnanir, elliheimili o. sv. fr.