Listaverkasafn Morten Lund komið á uppboð

Nú stendur yfir uppboð á listaverkasafni Morten Lund sem áður keypti fríblaðið Nyhedsavisen af Íslendingum og fór með það endanlega á hausinn. Í framhaldi af gjaldþroti blaðsins var Morten lýstur persónulega gjaldþrota í janúar s.l.

Í frétt um málið í Jylland-Posten segir að þegar Morten Lund seldi Skype, ásamt Janus Friis, fyrir nokkrum árum komst hann í hóp auðugustu manna Danmerkur. En Nyhedsavisen hafi verið einum of stór biti fyrir hann að kyngja.

Uppboðið fer fram hjá uppboðshaldaranum Lauritz.com og stendur til 23. júní. Verk eftir nokkra þekkta erlenda og danska listamenn er að finna í safni Mortens. Dýrasta verkið er eftir Barry McGee og heitir „Produce, Consume, Die" og er metið á 30.000 danskar kr. eða um 720.000 kr.

Meðal dönsku listamannanna eru verk eftir Christian Lemmerz, Jeppe Hein og Kristian Hornsleth.