Tugum milljarða í norskum seðlum smyglað úr landi

Talið er að tveimur til þremur milljörðum norskra króna í stórum peningaseðlum, eða 40 til 60 milljörðum kr., sé smyglað út úr Noregi á hverju ári.

Þetta kemur fram í umfjöllun Finansavisen um málið. Þar segir að 500 milljónir í seðlum hafi verið gefnar upp við tollyfirvöld við brottför í fyrra. Til baka inn í landið komu 10 milljarðar.

Stór hluti af þessu eru löglegar færslur fram og til baka. Nefna má að Norðmenn nota mikið sína eigin mynt í verslunarferðum til Svíþjóðar og víðar en ekki þarf að gefa upp peningamagn sem er undir 25.000 norskum kr. við brottför úr landinu. Þar að auki taka innflytjendur oft með sér norskar krónur þegar þeir ferðast til heimalands síns ef viðkomandi land er með veikt bankakerfi.

„Stór hluti af þeim seðlum sem koma til baka eru nýir og ónotaðir þúsund króna seðlar. Þessir seðlar koma ekki frá verslunum í Nordby í Svíþjóð. Stór hluti þeirra kemur fram Suðaustur-Asíu," segir Björn Röse forstjóri Tollgæslunnar í Noregi. „Þetta eru peningar sem koma frá skipulagðri glæpastarfsemi og svartri atvinnustarfsemi."

Röse telur að allt að þriðjungur fyrrgreindar heildarupphæðar, eða 2 til 3 milljarðar séu seðlar sem fyrst hefur verið smyglað út úr Noregi áður en þeir koma aftur til landsins.