Breskir leigusalar gætu tapað á Mosaic

Breskir leigusalar gætu þurft að sætta sig við að veita allverulegan afslátt af leiguverði í yfir 500 verslunum víða um Bretland í kjölfar greiðslustöðvunar Mosaic, sem er í 49% eigu Baugs.

Kaupþing sem lánaði Mosaic 400 milljón pund mun festa kaup á fjögur af stærsu merkjum keðjunnar strax en það eru Karen Millen, Coast, Oasis og Warehouse. Kaupin verða gerð í samvinnu við Derek Lovelock forstjóra Mosaic og aðra lykilstjórnendur sem munu eignast 5-10% í félaginu.

Neville Kahn hjá Deloitte hefur verið skipaður til þess að sjá um greiðslustöðvun félagsins. Kaupþing og Lovelock hafa sagst ætla að tryggja að lánadrottnar félagsins fái að fullu greitt, þrátt fyrir greiðslustöðvunina.

Það er Timesonline sem greinir frá þessu í dag en þar segir einnig að heimildarmaður innan Mosaic segi að áætlunin sé svipuð því sem kallað er skipti á skuldum fyrir hlutafé.

Kvennfataverslunin Principles og Shoe Studio verða seld í sitthvoru lagi. Sérfræðingar eru vantrúaðir á að verslunum Principles verði bjargað, sem aftur leiðir af sér ótta um að hundruðum verslana verði lokað í kjölfar greiðslustöðvunarinnar.

Mosaic hefur einnig áform um að loka óarðbærum einingum í öðrum keðjum sem hluta af endurskipulagningunni.