Eftirspurn fjárfesta eftir gulli rýkur upp

Eftirspurn meðal fjárfesta eftir gulli hefur rokið upp samkvæmt nýjum upplýsingum frá World Gold Council. Hinsvegar hefur eftirspurn eftir skartgripum úr gulli dalað töluvert.

Á fyrsta ársfjórðungi ársins nam eftirspurnin eftir gulli í heild samtals 1.016 tonnum sem er 38% aukning frá sama tímabili í fyrra. Eftirspurn eftir gulli sem fjárfestingarvöru jókst hinsvegar um 248% og fór í 596 tonn. Hinsvegar minnkað eftirspurnin eftir gulli til skartgripagerðar um 24%.

Í umfjöllun um málið á BBC segir að gull sé oftast álitið ein öruggasta fjárfestingin á óvissutímum og sem vörn gegn verðbólgu.

Kína sker sig nokkuð úr hvað varðar eftirspurn eftir skarti úr gulli því þar í landi jókst hún um 3% sem sýnir styrk kínverska hagkerfisins.

Eftirspurn eftir gulli til iðnaðarnota, en gull er notað í tölvu- og farsímaframleiðslu, minnkaði um 31% á fyrsta ársfjórðungi ársins.

Verð á gulli hefur hækkað úr 700 dollurum á únsuna í nóvember og upp í yfir 900 dollara í dag. Margir spá því að gullið fari yfir 1.000 dollara markið í ár.