Cadbury hafnar risatilboði frá Kraft

Breski sælgætisframleiðandinn Cadbury hefur hafnað risavöxnu yfirtilboði bandaríska matvælarisans Kraft. Kraft var tilbúið að leggja 10,2 milljarða punda eða vel yfir 2000 milljarða kr. á borðið en stjórn Cadbury sagði nei takk.

Samkvæmt frétt um málið í The Guardian segir að Kraft hafi samt ekki gefist upp á að eignast Cadbury og biðlar nú beint til hluthafa Cadbury.

Í tilkynningu um málið til kauphallarinnar í London segir m.a. að kaup Kraft á sælgætisframleiðandanum myndi tryggja störf í Bretlandi. Þar á meðal yrði hætt við að leggja niður verksmiðju Cadburys nálægt Bristol þar sem 500 störf eru í hættu. Cadbury áformar að leggja hana niður á næsta ári.

Þetta er ekki í fyrsta sinn sem reynt er að komast yfir Cadbury. Í fyrra gerði gosdrykkjarisinn Schwepps tilboð sem einnig var hafnað.

Saga Cadbury nær aftur til árins 1824 þegar John Cadbury opnaði fyrstu sælgætisverslun sína.