Stoðir vilja fá mann í stjórn Royal Unibrew

Í frétt um málið á börsen.dk er haft eftir Júlíusi Þorfinnsyni fjölmiðlafulltrúa Stoða að það sé „ekki ósennilegt“ að Stoðir muni sækjast eftir þessu stjórnarsæti.

Fram kom á hluthafafundi í Royal Unibrew í gærdag, þar sem hlutafjárauking hjá bruggverksmiðjunum var til umræðu, að framvegis yrði hlustað meir á óskir stórra hluthafa um samsetninguna á stjórn Royal Unibrew. Þetta sagði stjórnarformaðurinn, Steen Weirsöe, í ræðu sinni.

Fundurinn samþykkti hlutafjáraukningu og munu hlutir í Royal Unibrew tvöfaldast upp í 11,2 milljónir. Þessi hlutafjáraukning á að skila fyrirtækinu 420 milljónum danskra kr. í nýju fjármagni fyrir árslok.

Fram kemur í frétt börsen.dk að Stoðir hafi haft efasemdir um hlutafjáraukninguna og hvort skynsamlegt væri að fara í hana. Aukningin er tilkomin vegna þrýstings frá Danske Bank og Nordea helstu lánadrottna Royal Unibrew. Fyrirtækið skuldar þessum bönkum meirihlutann af um 2 milljarða danskra kr. lánum sínum.

Stoðum snérist hinsvegar hugur þegar ljóst var á fundinum að hlutafjáraukningin yrði helmingi minni en áður stóð til, það er 5,6 milljón hlutir í stað „upp að 12 milljónum nýrra hluta".